Heilög Lúsía og fylgdarlið vöktu lukku

Lúsíudagurinn er alltaf haldin hátíðlega í Árskóla, undanfarin ár hefur 7. bekkur haldið lúsíuna en í ár hefur 6. bekkur bæst í hópinn. Þar sem í framtíðinni á 6. bekkur að taka við lúsíusprotanum.
Lúsíudagurinn var haldinn 10. Desember en sjálfur Lúsíudagurinn er þann 13. Desember.

 

Sögurnar um heilaga Lúsíu eru þekktar allt frá 5. öld og hún var í miklum metum í kirkjunni. Til marks um það þá er hún ein fárra kvenna sem nefndar eru í dýrlingatali kirkjunnar þegar á 7. öld. Messudagur hennar er 13. desember – á myrkasta tíma ársins. Dagurinn er haldinn sem ljósahátíð, sérstaklega í Svíþjóð og í seinni tíð víðar á Norðurlöndum. Tengingin við ljósið er vegna nafns hennar sem dregið er af latneska orðinu Lux, sem merkir ljós.

Samkvæmt hefðinni gengur Lúsía fremst, klædd hvítum kyrtli og ber krans með logandi kertum á höfði. Það er meyjarkransinn, sem minnir á að heilög Lúsía gaf líf sitt Guði sem brúður Krists. Hún vildi frekar deyja en að rjúfa það heit.  Lúsíurnar voru tvær í ár, önnur úr 6. og hin úr 7. bekk. Þær ásamt þernum þeirra, stjörnudrengjum, piparkökustrákum og jólasveinum ferðuðust um bæinn og sungu jólasöngva fyrir gesti og gangandi. Umsjónarkennarar bekkjanna, ásamt þeim Írisi Baldvinsdóttur og Rögnvaldi Valbergssyni, höfðu veg og vanda af Lúsíudeginum. Krakkarnir æfðu stíft í margar vikur fyrir stóru stundina. Um morguninn heimsóttu lúsíurnar nemendur í Árskóla við Freyjugötu, en eftir hádegi heimsóttu þau Heilbrigðisstofnunina á Sauðárkróki, Byggðastofnun, Skagfirðingabúð  og enduðu daginn í Íþróttahúsinu á Sauðárkróki.